Vun dä Plätz de he zo Köllen angelaht (Der Aldermaat)

Volkslieder » Mundart, Niederdeutsch und Dialekte »

Vun dä Plätz, de he zo Köllen angelaht
Eß un bliev dä schönsten doch dä Aldemaat
We steit medden drop su stramm
dä Jan vun Wäth,
Steit de Bein sich en der Liev,
weil leider ohne Pääd;
Unger sitz dä kölschen Boor,
Un de Jumpfer op der Loor,
Un dä Gabbeck, wann de große Ohr erklingk,
Op däm Platz de Lück angringk;
Doröm säht och jede Kölsche:
„Wat en Staat!!
Alaaf huh dä Aldemaat!“ Hurrah!

Doch dä Aldemaat eß nit för uns blooß doh,
Nä, och för de Booren all vun fään un noh.
Morgens, wann de Sonn opgeit, sin de aläät,
Träcken durch de Poozen en
met Eselen un Pääd.
Jede kritt vum Maatscharschant
Ehre Zeddel en de Hand;
Wann et kalt eß, met dem Hutschpott,
och, wie schön,
Wärmb sich dann de Boore-Möhn,
Rööf vör Freud op all dat Geld, wat sei erwaat:
Alaaf, huh dä Aldemaat! Hurrah!

Un wat brängk dä Boor nit alles en de Stadt:
Hasen, Höhner, Duuve, Kning un Koonzalat,
Schötzeneere, Pitterzilie, Zellerei,
Blomeküül, Andive, Ollig, decke Milch,
Mackei, Fleutekies un Fuustekies,
Un wie hä dat all anpries!
Saht ens. Häär, su rööf de Frau,
no gelt ens jet!
Vleex e Rüüschen, ovv en Flett?
Alles, wat Ehr wellt, ha’mer jo metgebraht;
Alaaf, huh dä Aldemaat! Hurrah!

Wat en Boorenhätz sich eckersch wünsche kann,
Eß op unsem Aldemaat och glich zo han:
Peffer, Kaffee, Zuckerei, Kaniel, Beschoot,
Wichs, Rusinge, alles eß em „Düüvchen“ evve got.
En der Lintgaß kritt dä Poosch
Unt et Weech jet för der Doosch;
För de Kleider ävver eß dä Sibbestähn
Un de Bechergaß nit fään.
Wann se heimgon, han se all
sich goot vermaat:
Alaaf, huh dä Aldemaat! Hurrah!

Fasteleer spillt och dä Aldemaat sing Roll:
Wieverfastelovend eß ald alles doll;
Mötze fleegen, un wat eß dat ei Gejuhz,
Kritt dä einen ov dä andre
ens en dücht’ge Knuuz.
Sonndags süht mer bräsele
Königswintrer Esele,
Un kütt Rusemondag unse Zog dohin,
Wo ka‘ mer dä schöner sinn?
Dann röf secher alles:“ Wat en wahre Staat!“
Alaaf huh dä Aldemaat! Hurrah!

Text: Peter Kemp am 25. Januar 1819 –
Musik: Friedrich Wilhelm Schulze , Karnevalslieder-Sammlung S. 127
in Kölsche Lieder , Köln , ca. 1930