Do drowwe uff´m Berg (Holladihi)

Scherzlieder | Tanzlieder | | 2005
Mp3, CDs und Bücher dazu: :
CD buch

Zwische Lautre un Hochspeyer, do steht e Tunnell.
Wammer neifahrt, werd´s dunkel, wammer rauskummt, werd´s hell.

Do drowwe uff´m Berg, do steht e Chines,
der reibt sich sein Glatzkopp mit Limborjer Kees.

Do drunne im Dal, do hausen zwä Lumpe,
die han nix im Beidel, drum gehn se halt bumpe.

Die Bayre saan „Kneedel“, die Pälzer saan „Knepp“,
die Schwowe saan „Spatze“, do lach ich mich schepp.

Mei Schatz is katholisch, so fromm is er net,
is wallfahre gange, zu mir in mei Bett.

Mei Schatz is mer liewer wie’s Geld in de Kassett.
Beim Schatz kann ich schloofe, beim Geld awwer net.

E kohlschwarzer Rappe un e schneeweißer Schimmel:
Der Kerl wo net heirat, kummt net in de Himmel.

Un wann ich kää Schatz han, do han ich kää Sorje.
‚S werd Owend, ’s werd Nacht un ’s werd aa widder Morje.

Un die Annatande hot e Kind kriet, vun de Kattchtande ehrm Mann,
sagt die Annatande zu de Kattchetande: wann de`s han willsch, kannsch’s han!

Vor de Stadt drauß imme Wertshaus, hockt e Fraa, die hääßt Gret,
hat e Schlappmaul, hat e Henkmaul, hat e Noos wie e Trumbeet.

De Mädle, wu peifen, de Hinkle, wu krähn,
denne muß ma beizeide de Hals erumdrehn.

Zwische Oschtre un Pingschde, do geht der Schnee weg,
do heiert mei Schätzel, do hab ich en Dreck.

Ich steh uffm Brickel un spauch in de Kahn,
do fräät sich mein Spauz, daß er Kahn fahre kann.

Die Bayre sin luschdich, sie kenne schuhplattle.
Sie saufen viel Bier un sie batschen ehr Madle.

Mer Pälzer sin luschdich, mer han aa viel Frääd.
Mer han guder Wei, un mer han schääne Määd.

Wie hoch is de Himmel, wie glänzen die Stern.
Wie schloofen die Mannsleit bei de Weibsleit so gern.

Heit nacht so um zwelfe hot mei Bettlad gekracht.
Mei Schatz is en Schreiner, hot’s glei widder g’macht.

Jetzt hawwe mir g’sunge un’s Liedel is aus.
Wer nachts nit kann schloofe, der spiel Katz un Maus.

Quelle: “ Die Krott “
Text und Melodie: anonym , trad. Pfalz –
auch als Tanzlied: Pfälzer –
weitere Versionen dieses Liedes







Kinderspiele | Fussball-Lieder | Balladen | Kinderlieder | Liebeslieder | Weihnachtslieder